Денеска дуели за пласман и за мерак

  • 10.07.2022
  • Вести, Актуелно
Португалија и Шпанија обезбедија пласман во следната рунда на натпревари на М20 ЕП. Денеска играат меѓусебе. Единствена можност да се види вонсериското португалско трио Мартим Кошта - Андре Соуса - Франциско Кошта како ќе се снајде против шпанскиот систем. 
Шпанците на овој шампионат уште еднаш и тоа на најубав начин демонстрираат што значи играњето во систем од најмлади категории и како може еден тим во кој нема ѕвездени имиња да игра колектив и да ги победува со леснотија силните ривали. 
Во оваа група се и Норвешка и Полска. Поразениот од ово меч би можел лесно да стане противник на Македонија во квалификациите за М21 СП 2023, доколку успееме да го освоиме ЕХФ Шампионатот во Варна. 
Шпанија и Португалија играат од 20:30 часот, Полска и Норвешка од 18:00.



Хаосот во групата „Б“ каде што сите екипи имаат по една победа и пораз ќе биде расчистен денеска откако Унгарија ќе се сретне со Ф. Острови (13:00), а Данска со Словенија (15:30). Унгарија има шанси да го испрати Ф. Острови на последното место, првенствено затоа што нивниот прв играч Елијас а Скипаготу се повреди на првиот меч. Данска, пак, по поразот од Ф. Острови би можела низ иглените уши да мине во главната рунда. 

На рангот на Португалија и Шпанија на овој шампионат игра и екипата на Шведска во групата „Ц“. Имаат две победи и гол разлика што им обезбедува пласман во следна рунда и со пораз од 11 гола против Хрватска (13:00ч) . Што се однесува до Хрватите, тие можат до главна рунда со каква и да е победа над Шведска. 
Франција го чека исходот од овој дуел, а Црна Гора е отпишана, освен ако не ја победи Франција со три гола разлика, а Хрватска да загуби од Шведска. Франција и Ц. Гора играат од 15:30 часот. 

На Србија и е доволно и реми со Италија за да верификува пласман во главната рунда (20:30ч). Германија со победа над Исланд (18:00ч) исто така би одела во главната фаза. Шанси имаат и Италија, па и Исланд, но премногу комбинаторики има за објаснување како би се извело тоа. 

Поврзани вести

Се повреди ѕвездата на чудото на ЕП
Прво засилување за Аеродром
Игор Вори ќе води германски клуб
Ви се допаѓа текстот?
Кликнете Like на нашата FB страница и станете дел од g-sport.mk