Женската репрезентација на Македонија одигра коректно против изменетиот тим на Норвешка, репрезентација што е актуелен светски и европски првак и најуспешен ракометен колектив во историјата на овој спорт. 




„Начелно сум задоволен од тоа што девојките го прикажаа на натпреварот со Норвешка. Убаво е да се види кога играчите се трудат, даваат и повеќе од тоа што можат и се жртвуваат на теренот. Резултатот 18-24 е да не бидам погрешно разбран, во ред, ракометен резултат е тоа, не примивме премногу голови, 24 гола од Норвешка е коректно. Можевме и подобро, но направивме повторно премногу грешки. Не ги сметам овде промашените зицери, тоа е дел од играта. Зборувам за топки фрлени во аут, за нерешителност кога е пасивна игра итн. Истото беше и со Словенија, а тоа се должи на пад на концентрација. Немаме доволно добра ротација за да ги одмориме играчите во текот на натпреварот, а тоа да не се примети во играта. Ни недостасуваат неколку играчи, па кога ќе имаме комплетен ростер би требало да бидеме и подобри“, вели селекторот Љубомир Савевски. 

Женската сениорска репрезентација на Македонија е на прагот да излезе од тој маѓепсан круг во кој влезе по Европското првенство во 2012 во Србија и да фати континуитет на настап на големи натпреварувања. 

Во женскиот ракомет ЕП се уште се игра со 16 репрезентации и во тоа друштво е многу тешко да се влезе. Добрата вест е што системот се менува по ЕП во Макеоднија/Словенија/Црна Гора и ЕП ќе се игра со 24 репрезентации, а со тоа и патот низ квалификациите ќе биде многу полесен. 

Тоа што Македонија е домаќин на следното ЕП, значи дека по автоматизам со учеството, во баражот за пласман на следниот мундијал што во 2023 ќе се одржи во Данска, Шведска и Норвешка, ќе бидеме во првиот шешир.
Така е вообичаено кога на ЕП има 16 репрезентации, а мундијалот е да потсетиме со 32 учесници. Со малку среќа во ждрепката би можеле и на СП, а таму ќе има многу екипи посебно неевропски што би можеле лесно да ги добиеме и да имаме и повидна улога. 
Патот кон враќање на дамите на големата сцена е отворен и трасиран, но нема да биде без предизвици. Во секој случај, шансите да играме на ЕП или СП се многу поголеми отколку што беа досега.