Мартин Серафимов и Игор Ѓоргиев двајцата сениорски репрезентативци на Македонија, потпишаа договор со новоформираниот клуб Алкалоид. Мартин Серафимов досега настапуваше за екипата на Металург, додека Игор Ѓоргиев е бивш ракометар на екипата Голден Арт КЛ7. 




РК Алкалоид денеска ги официјализираше првите два трансфера:

„Со склучувањето на првите два договора со едни од најперспективните млади ракометни надежи и репрезентативци, РК „Алкалоид“ го започна процесот на регрутација. Мартин Серафимов (21 година), кој игра на позицијата десен бек, и Игор Ѓоргиев (21 година), кој игра на позициите централен и лев бек, својата кариера ќе ја продолжат во новоформираниот ракометен клуб, РК „Алкалоид“.
 
Новиот македонски ракометен клуб, РК „Алкалоид“, е формиран со цел младите таленти кои имаат потенцијал и желба за игра правилно да се насочат и да се развиваат, во насока на градење врвни ракометни играчи со позитивни животни вредности. Дефиниран систем на функционирање, правилна работа, како и интегритет и кредибилитет во работењето се основните начела за кои се залага овој клуб.
 
Со организација на стручната работа РК „Алкалоид“ ќе се стреми да им овозможи на играчите квалитетен и напреден тренажен процес, со цел нивно натамошно развивање и градење како врвни ракометари, кои ќе ги вложуваат своето знаење, искуството и позитивните вредности во македонскиот ракомет“, се вели во соопштението на клубот.