Алкалоид го доби противникот за следната елиминациска рунда во ЕХФ Европскиот куп. Македонскиот претставник ќе игра против романската екипа Баја Маре двомеч во последната недела од март.
Ждрепката е поволна од аспект дека се избегнати трите фаворити АЕК, Олимпијакос и Партизан, но не значи дека противникот е лесен. Напротив, се работи за тим во кој има девет интернационалци, дел од нив препознатливи репрезентативци и познати домашни ракометари со големо акумулирано искуство.

„Добивме квалитетен противник во 1/4 финалето на ЕХФ Европскиот куп. Екипа што доаѓа од ракометна нација. Сите екипи што стигнале до 1/4 финале на ова натпреварување поседуваат квалитет, а наша мала предност е што вториот натпревар ќе го играме во Скопје. Очекувам неизвесни дуели и голема борба за влез во полуфиналето“, изјави тренерот на Алкалоид, Кире Лазаров.