Тинекс Пролет во седмото коло ја запиша втората суперлигашка победа, екипата која од Скопје си замина со празни раце е МРК Куманово, а резултатот е 28-25.
Куманово се чини како екипа која е ниво повисоко од ланската сезона, се покажаа како тврд орев и против тимот на Ацо Јовиќ, но кога беше најважно, во последните 15 минути домашните беа подобри и заслужено ги освоија бодовите.
Куманово беше тимот што подобро го отвори натпреварот и имаа контрола над играта до 9-12, кога Тинекс Пролет ја среди одбраната, постигна лесни голови и не дозволи гостите да одат на полувреме со предност.

Домашниот состав го контролираше резултатот на стартот од второто полувреме, но кумановци за момент поведоа со 20-21.
Брзо стигна одговор од домашните, преку Стојановски и Палевски го свртеа резултатот во своја полза и со предност од 23-21 го принуди гостинскиот тренер да побара тајмаут. Потоа Тинекс Пролет стигна до најубедливи четири гола предност (25-21).
Тоа беше клучниот момент, потоа гостите се обидоа да се вратат во игра, но само делумно успеаја да го ублажат поразот.