Photo credit: IHF / kolektiff / Sasa Pahic Szabo

Вториот ден од женскиот Олимписки турнир почна со драма и изненадувачка победа на Унгарија над Бразил. „Изненадувачка“ имајќи го предвид импресивниот старт на Бразил и победата над Шпанија и воведниот пораз на Унгарките од домашната Франција. 

Бразил водеше речиси цел натпревар. Во 40 минута имаше и пет гола предност (18-13), но уште еднаш Унгарија покажа карактер, волја и квалитет за да се врати во игра. 
Драмата почна во 55 минута, кога Унгарија комплетираше два гола по ред за израмнување (23-23). Бразил постигна гол за водство, а потоа следеа два гола на Петра Симон, вториот на само пет секунди до крајот за победа на Унгарија од 25-24. На тој гол му претходеа по две промашувања и од Бразил и од Унгарија. 

Ако не знаевте: Стрелецот на голот за реми и на голот за победа Петра Симон е „онаа“ ракометарка што не допатува со Унгарија на Јуниорското Светско првенство во Скопје одржано во јуни, иако според возраста имаше право да настапи. Петра Симон стана сениорска репрезентативка и според принципите по кои се работи во Унгарија, таа веќе не настапува за помладата категорија и го отстапи своето место на друга ракометарка. Унгарија да потсетиме, на СП во Скопје стигна до финалето каде што беше поразена од Франција.