Најсилната светска ракометна лига, германската Бундеслига стартуваше со натпревари по паузазат поради Европското првенство.
Веќе во првото пролетно коло се сретнаа Кил и Магдебург во Вундерино Арена во Кил. Победи Магдебург (33-26). Убедливо, веќе во првиот дел европскиот шампион имаше плус седум, а потоа со некои падови и подеми на крајот без резултатска неизвесност му покажа на Кил дека местото не му е во трката за шампионската титула. По 19 од вкупно 34 кола, Магдебург сега има осум бода повеќе од Кил кој е на петтото место. 
Елијас Елефсен а Скипаготу, лидерот на Фарски острови беше првиот плејмејкер на Кил откако Домагој Дувњак заработи директен црвен картон поради опасен старт во 22 минута. Постигна два гола, но одлично го разигруваше нападот, а и самиот индивидуално изнудуваше и седмерци и исклучувања. 

Многу поголема драма имаше во Вецлар, каде што тимот на нашиот Филип Миркуловски (асистент тренер) минимално, со пресврт 31-30 го совлада Ајзенах. 
Најдобриот стрелец во Бундеслигата, Швајцарецот Мануел Зендер кој играше и против Македонија во Берлин беше маестрален и постигна 15 гола на овој меч. Но, промаши и клучен пенал на минута и пол до крајот. 
Вецлар со оваа победа се искачи на седмото место (19 бода) и за разлика од ланската сезона, сега опстанокот е блиску. Но, вистинска мешаница е сѐ до 17 место на кое се три екипи со по 13 бода и натпревар помалку.