Во текот на целата година организаторите на Европското првенство информираа за текот на продажбата на билети за ЕХФ Еуро 2024 и постојано нагласуваа дека билетите, особено тие за групата „А“ во која е домашната Германија, Франција, Македонија и Швајцарија се особено барани првенствено поради домашниот тим. 
Групата „А“ ќе биде најгледаната група во живо во историјата на ракометот, затоа што првиот меч ќе се игра пред повеќе од 50.000 гледачи на фудбалскиот стадион во Дизелдорф, а потоа групата се сели во Берлин каде што ќе се игра пред 15.000 гледачи во салата Мерцедес Бенз Арена. 
Организаторот, објави дека билети за групата „А“ веќе нема. 
РФМ која постојано добива барања за билети денеска издаде соопштение за јавноста. 

Почитувани љубители на ракометот,

Почитувана спортска јавност,

Ве известуваме дека до Ракометната Федерација на Македонија секојдневно пристигнуваат барања за билети за претстојното Европско ракометно првенство во машка сениорска конкуренција, кое ќе се одржува во Германија во период од 10ти до 28ми јануари 2024 година.

Ракометната Федерација на Македонија, односно машката сениорска репрезентација е учесник на претстојниот спортски настап, согласно регулативата на Европската ракометна федерација правата за продажба на билети за европски спортски настани се кај домаќинот на првенството, во овој случај тоа е ракометната федерација на Германија и нивниот организационен комитет.

Европската ракометна федерација преку своите медиумски соопштенија уште во месец мај 2023 година, објави дека има огромен интерес за билети за претстојното првенство и дека половина од билетите за натпреварите во продажба се веќе распродадени, особен интерес и побарувачка за билети имаше во групата А каде настапува и македонската сениорска репрезентација, бидејќи во група А се наоѓа и домаќинот Германија.  

Од страна на организаторот преку online мрежата за продажба, во месец септември 2023 година беа пуштени во продажба и последните слободни 10.000 билети, кои во екстремно брз временски рок беа распродадени.

Ве молиме бидете информирани дека билетите за натпреварите во Група А каде настапува и македонската репрезнетација, по добиената информација од страна на ракометната федерација на Германија и нивниот организационен комитет се распродадени.

Со почит,

Ракометна Федерација на Македонија