Е. Пелистер раскина и со Каспер Кисум

Еурофарм Пелистер денеска информираше дека спогодбено е раскинат договорот со данскиот бек Каспер Кисум. 
Ова е епилог што веќе го најавивме како можен следен чекор од расплетот во играчките промени кои се изведуваат во битолската екипа. 
Каспер Кисум е еден од ракометарите кои имаа позабележителна улога во клубот и придонес во освојувањето на шампионската титула минатата сезона. 
Но, работите се менуваат, а тој стана дел од промените во клубот и трет странец кој неделава заминува од Битола по Вилсон Дејвис и Андреас Нилсон. 


РК Еурофарм Пелистер и данскиот интернационалец Каспер Кисум постигнаа спогодба за раскин на соработката. Во новата 2024 година еден од хероите од сезоната 2022/23 ќе настапува за друг клуб. 31-годишниот лев и среден бек остави силна трага во дресот на нашиот клуб и има големи заслуги за освојувањето на титулата минатата сезона.
Кисум во првиот дел од сезоната постигна 12 голови во Лигата на шампионите, а редовно го носеше зелено-белиот дрес и во Суперлигата. Со неговата професионалност и неспорен квалитет клубот доби големи придобивки во неговиот едногодишен престој во Битола и вратите од нашиот клуб секогаш ќе бидат отворени за Каспер Кисум.
РК Еурофарм Пелистер му посакува приватни и професионални успеси на Каспер Кисум.

Ви се допаѓа текстот?
Кликнете Like на нашата FB страница и станете дел од g-sport.mk