Еден од најдобрите светски голмани, германскиот репрезентативец Андреас Волф е повикан и тренира со германската репрезентација која утре и задутре ќе одигра два контролни натпревари со селекцијата на Египет. 

Андреас Волф со недели е надвор од теренот поради повреда (диск хернија) и рехабилитацијата оди полека. Тој досега нема настап за Келце во Лигата на шампионите, но во договор токму со полскиот клуб, ако се чувствува добро и нема болки, би можел против Египет да добие десетина минути на терен. 

Силвио Хајнефетер (Штутгарт) и Давид Шпет (РНЛ) се двајцата голмани на кои вистински ќе се потпре селекторот Алфред Гисласон. Но, тој вели дека доколку Андреас Волф комплетно заздрави и биде спремен, тогаш тој ќе биде првиот избор за Европското првенство во јануари.
Македонија и Германија ќе се сретнат во второто коло од ЕП, на меч во „Мерцедес Арена“ во Берлин, пред предвидени 15.000 гледачи.