Голем хендикеп доживеа македонската кадетска репрезентација на само неколку дена до стартот на Светското првенство У19 што ќе се одржи во Хрватска. 

Единствениот десен бек и еден од најдобрите играчи во тимот, Димитар Узунчев се повреди и ќе го пропушти мундијаллот. 
Фрактура на метатарзална коска на стапалото е дијагнозата на повредата здобиена вчера, на контролниот меч на кадетите со екипата на Еурофарм Пелистер. Операција веројатно нема да биде потребна, стапалото е “гипсирано“, а паузата ќе биде најмалку 3-4 недели. 

Македонските кадети во понеделник патуваат за Ријека, а на 2 август ќе го одиграат натпревар на кој противник ќе ни биде селекцијата на Норвешка. Потоа ќе играме и со Црна Гора и Грузија. Оваа повреда е сериозен удар за нашата екипа. Тренерскиот тандем Стојановиќ и Ангеловски ќе мора итно да смислат нови решенија со кои ќе го компензираат отсуството на Димитар Узунчев.