Ракометната игра оди напред за тие што го прифаќаат стилот на брза игра, производство на играчи, а не се заглавени во стилот купи - продај и игра систем без систем. 
Дојде времето ракометна Европа, а и ние меѓу нив да се „плашиме“ од Фарските острови. Да не биде претежок зборот плашиме, целосен респект и бришење на улогата фаворит е најблиску до тоа што паметните и реалните наскоро ќе треба да го прават и во сениорска конкуренција кога е збор за оваа островска селекција. 

По ланските хитови кога ги совладаа генерациските врсници од Данска и Норвешка, репрезентацијата до 21 година на Ф. Острови сега (34-31) ја совлада и Шпанија! Тоа е резултат за респект и јасна најава за тоа што ќе го гледаме и во сениорска конкуренција. 
А во сениорска конкуренција и тоа во дресот на Кил ќе го гледаме Елијас Елифсен а Скипаготу како замена за Сандер Сагосен и крилото Хаукн Вест Ав Тејгум кој следната сезона оди во Фуксе Берлин каде што ќе го спремаат да биде замена за најдобриот стрелец во историјата на Бундеслигата - Ханс Линдберг. 
Овие двајца ракометари на Шпанија и дадоа заедно 15 гола, а на сцената извадија и пивот, тој се вика Исак Веделсбол, постигна 8/11, а игра за екипа што се вика Hondbóltsfelagið Neistin. Очекуваме наскоро да го видиме како „емигрира“ кон континентот, веројатно скандинавијата. Да не заборавиме, Ф. Острови имаат уште еден суперталент, се вика Оли Митун има 18 години и сезонава играше заедно со Елијас Скипаготу во Савехоф. Тој не е на овој мундијал. 

Од мундијалските случувања на географски хибридното СП што се одржува во Германија и Грција, ќе одбележиме дека во главната рунда не се пласираа Словенија, Норвешка, Полска и Јапонија. 

Во главна рунда одат Хрватска, Франција, Германија, Тунис, Португалија, Бразил, Ф. Острови, Шпанија, Унгарија, Данска, Шведска, Бахреин, Исланд, Србија, Египет и Грција. 
Сите овие екипи имаа искушенија освен Египет и Грција кои за ривали ги имаа С. Арабија и веројатно најслабиот тим на СП - Куба. 

Денеска на СП У21 е слободен ден, од утре стартуваат натпреварите од Главната рунда и Президент Куп.