Македонија обезбеди пласман на ЕП, осми во репрезентативната историја, седмо ЕП по ред. На 10 мај во Германија ќе биде одржана ждрепката на која нашата репрезентација ќе ги добие противнците. 
Ако квалификациите за ЕП се „лесни“, тогаш квалификациите за главната рунда на ЕП се комплетната спротивност, особено за репрезентациите што се од трет и четврти шешир. 
Системот за кој и натаму тврдиме дека не е фер, а ЕХФ воопшто нема никаква намера да го менува вели дека по прелиминарниот дел, односно три одиграни натпревари, пола од репрезентациите ќе си одат дома. 

Користејќи ја формулата на ЕХФ, ги составивме четирите шешири за ждрепката што ќе се одржи на 10 мај. Македонија е во третиот шешир. Избегнуваме неколку опасни екипи, пред сѐ Хрватска која откако не успеа да ја победи Холандија барем на еден од двата натпревари, од потенцијално вториот шешир, се пресели во третиот. 

Голем „кикс“ во последното коло направи и екипата на Црна Гора која со домашниот пораз од БиХ, на ЕП ќе оди како една од третопласираните, а за нив е резервиран четвртиот шешир. 


ШЕШИРИ ЗА ЕП 2024
1 ШЕШИР
Франција (група А или Б), Шпанија (група А или Б), Исланд (група Ц), Норвешка (група Д), Шведска (група Е), Данска (група Ф)
2 ШЕШИР
Германија (група А), Португалија, Австрија, Словенија, Холандија, Унгарија
3 ШЕШИР
Хрватска (Група Б), Македонија, Србија, Полска, Чешка, БиХ
4 ШЕШИР
Црна Гора, Швајцарија, Романија, Грција, Ф. Острови, Грузија

Македонија како екипа од третиот шешир, во првото коло ќе игра против екипата од првиот шешир, потоа, во второто коло со екипата од вториот шешир и во третото коло ќе се сретне со тимот од четвртиот шешир. 

Групата А ќе се игра во Берлин, освен првиот меч што ќе се игра на стадион во Дизелдорф, а на тој меч ќе играат домаќинот Германија против екипа од четвртиот шешир. 
Групата Б ќе се игра во Манхајм. Таму е пласирана Хрватска како екипа од третиот шешир, што значи дека Македонија таму нема да игра.
Групата Ц ќе се игра во Минхен. Таму од првиот шешир е сместен Исланд.
Групата Д ќе се игра во Берлин. Таму од првиот шешир е сместена Норвешка.
Групата Е ќе се игра во Манхајм. Таму од првиот шешир е сместена Шведска. 
Групата Ф ќе се игра во Минхен. Таму од првиот шешир е сместена Данска. 

Најдобрите две од групите А, Б и Ц во главната рунда ќе играат во Келн.
Најдобрите две од групите Д, Е и Ф во главната рунда ќе играат во Хамбург.