Супер лига: Дуел на непоразените Вардар и Алкалоид

Денеска во машката Супер лига се играат натпревари од редовното четврто коло. Дерби мечот е во „Јане Сандански“ каде што се среќаваат единствените две екипи што досега победија на сите три натпревари. Тоа се Вардар 1961 и Алкалоид.

Вардар и Алкалоид вечерва ќе се сретнат во „Јане Сандански“ (18:30 часот) како две екипи со сите победи од досегашните кола.
Вардар е големиот фаворит на овој меч, но ќе биде интересно да видиме како еден од најмладите тимови во Супер лигата ќе изгледа и ќе се бори на терен на дуел со познатиот црвено-црн состав. Досега Алкалоид изгледаше многу добро, особено на дуелот со Охрид кој исто така важеше за фаворит. Сега има уште потежок противник пред себе.

Охрид почна поспоро, но тоа можеше и да се очекува со оглед на тоа дека 80% од ракометарите дојдоа во клубот летово. Но, потенцијал во тим што има проверени македонски играчи и осум странски засилувања нормално дека има и од нив се очекува да стануваат се подобри како што ќе минува времето. Следниот предизвик им е на гостински терен, денеска против Куманово. Кумановци запишаа една победа, па сега се во покомотна позиција и можеби вечерва ќе бидат незгоден ривал за охридскиот состав.

Струга има одличен старт на првенството. Тоа се должи и на нивната добра игра и на полесниот распоред. Денеска имаат шанса да освојат нови бодови, им гостува Прилеп.
Екипата на Резо Чантурија игра подобро отколку што кажуваат резултатите, но време и да се види и резултат зад нивното име. Имаа реално потешки натпревари, па сега ќе видиме од што се направени.

Убав меч попладеново би требало да биде Голден Арт и Е. Пелистер 2. Во оваа група малку се измешаа работите, се чини дека секој секого може да победи, па затоа и на битолчани во Скопје нема да им бидат однапред запишани бодовите.
Тиквеш влезе во ритам по стартниот пораз, Скопје е тим што е доста непредвидлив, па и овде ќе биде интересно да се види каков ќе биде финалниот исход.

ДЕНЕСКА:
12:30 Голден Арт - Е. Пелистер 2 (Група „Б“)
17:00 Струга - Прилеп (Група „А“)
17:30 Скопје - ГРК Тиквеш (Група „Б“)
18:30 Вардар 1961 - Алкалоид (Група „А“)
18:30 Вардар (Н) - Бутел Скопје (Група „А“)
19:00 Куманово - Охрид (Група „А“)

Супер лига: Дуел на непоразените Вардар и Алкалоид

Поврзани вести

Популарни вести

Најнови вести

За нас

Тагови

Колумни

Најнови вести