На ЕХФ Шампионатот во Скопје, во дресот на репрезентацијата на Македонија видовме дузина играчи кои во своите клубови не добиваат шанса, минутажа, не можат да напредуваат... 

Марко Мишевски е еден таков играч. Искрено малкумина го знаат, иако се работи за играч со одлични физички предизспозиции и претствува голем потенцијал, или како што имавме често можност да слушаме од таборот на нивниот најголем домашен ривал - дијамант што треба да се бруси. 

Игра во Вардар, но во вториот тим и по успешниот настап на ЕХФ Шампионатот, откако играчите сами си одработеа на својата промоција и тоа во националниот дрес, добива шанса во првиот тим. 

Гарсија Парондо го има во план Марко Мишевски за подготовките на екипата во Словенија и турнирот во Германија. Дали Мишевски ќе успее да се наметне како сериозна опција на надворешната линија ќе покаже времето. Во Вардар, освен Столе Стоилов, македонските играчи не минуваа добро. Сега, е Вардар поинаков со преполовен буџет, без една цела постава од ланскиот тим, па реално и се отвори можност и некој македонски играч да покаже дали може или не. 
Мишевски не е прекомандуван во првиот тим, тој и натаму е играч на Вардар Јуниор, но ќе биде заедно со голманот Даниел Ставровски кој ќе пополнува празнини настанати по заминувањето на Штербик и Милиќ и повредата на Ѓоргески. 

Потегот на Парондо е за поздравување, но дури и да го задржи Мишевски во тимот, тоа ќе биде „една ластовица“. 
Речиси сите македонски репрезентативци до 20 години, за помладите и да не зборуваме, се соочуваат со истиот проблем. Немаат минутажа во своите клубови, а тука го вклучуваме и најфалениот клуб во работа со млади категориии - Металург. Но, сега селекторот е тренер на Металург, па ќе може сам да си решава кој репрезентативец колку ќе му игра во клубот. 

Што се однесува до другите играчи, веќе се актуелизираат шпекулации за трансфери и заминувања, но ќе оставиме да добијат приказните и малку поконкретен облик.