Двајца познати и истакнати ракометни работници од денеска се челенови на небескиот ракометен тим.
Богданци и Прилеп останаа без личностите кои го променија изгледот на спортот во овие градови и оставија неизбришлива трага и тага во спортот и кај сите што ги познаваа. 

Вчера почина Гоце Петрушев, поранешниот градоначалник на Богданци и креатор на тимот на Младост, клуб што играше многу важна улога во македонскиот ракомет низ деведесеттие и првата деценија на новиот век. Го одржуваше Младост на ниво на најсилните македонски екипи, а Богданци место каде што се решаваа државните првенства, иако Младост никогаш не успеа да стане првак или освојувач на Купот. 
Тоа што тогаш се работеше во Богданци остави поинаков и повреден резултат. Благодарение на „тогаш“, Богданци сега ги има Митко Стоилов, Никола Роглев, Иван Арнаудов, Мите Караиванов, а спомените од убавото време нема да бидат никогаш избришани. 

Денеска и ракометен Прилеп е завиен во црно. Петре Таста Кузманоски си замина на 66 годишна возраст. Не постои ракометен работник, посебно од градот под Марковите кули што не го знаеше харизматичниот Таста. Беше тренер и на машката и на женска екипа на Тутунски Комбинат, подоцна и претседател на клубот. 
Беше директор на јуниорската репрезентација на Македонија која 2000 година играше на ЕП Атина, генерацијата на Лазаров, Мојсоски, Темелков, Јоновски... 

Почивајте во мир