Металург се обидува да создаде тим во кој ќе доминираат млади ракометари. Играчи кои под палката на Лино Червар во Лигата на шампионите и СЕХА Гаспром лигата ќе треба да тргнат по стапките на Марковиќ, Циндриќ, Борозан, Талески, Обрадовиќ... 

Јануш Лапајне и Лука Стојановиќ се две такви имиња, а Металург се обидуваше да го одоброволи Пари Сен Жермен покрај Лапајне да направи отстапка и за уште еден ракометар. 

Левиот бек Халил Јагањац (18) беше желба на тимот од „Автокоманда“. Два метри високиот лев бек од Риека, мина една сезона меѓу „светците“, а плановите на Нока Сердарушиќ се претстојната сезона да го има во професионалниот тим, во друштво со Никола Карабатиќ, Микел Хансен и Сандер Сагосен. 

Останува опцијата во текот на сезоната нешто да се промени, но тоа во моментов повеќе изгледа како куртоазија.