Македонскиот репрезентативец Филип Кузмановски потпиша за Еурофарм Пелистер. Само неколку часа откако Вецлар објави за спогодбениот раскин на договорот, а сите сигнали велеа дека Кузмановски ќе се врати во Битола, Е. Пелистер го потврди трансферот. 

Ни претставува особена чест и задоволство да ја информираме јавноста дека од денес нов член на Еурофарм Пелистер е македонскиот репрезентативец Филип Кузмановски. Процесот на обединување на македонските репрезентативци и квалитетни странски засилувања продолжува и враќањето на нашиот поранешен член е одлука која оди во тој правец.
27-годишниот Кузмановски е дете на Пелистер, сите ракометни чекори ги направи во Битола и доби афирмација во нашиот дрес. Потоа се пресели во Металург, кратко играше во Еурофарм Работник, па се одлучи за интернационална кариера. Кузмановски избра германски предизвик и ја искуси Бундеслигата. Една сезона го носеше дресот на Магдебург, па три сезони настапуваше за Хановер, а од јануари годинава го носеше дресот на Вецлар.
Филип Кузмановски наскоро ќе му се стави на располагање на стручниот штаб и неговото деби се очекува деновите во Суперлигата и Лигата на шампионите. Официјалното претставување на Кузмановски како нов ракометар на Еурофарм Пелистер е закажано за понеделник 20 ноември.

Филип Кузмановски во домашниот шампионат на Македонија нема да може да игра до Плејоф, за кога и реално му е потребен на Е. Пелистер, додека за Лигата на шампионите има опција (late entry) да заигра во осмото коло. Потребно е да биде пријавен до 20 ноември кога истекува рокот за пријава на нови играчи за споменатото осмо коло во кое Е. Пелистер на домашен терен ќе игра со ПИК Сегед.